Mendillorriko ur-biltegiak

Tokia. Jostetarako tokia tradizioz

Tradizionalki, Mendillorriko muinoa jostetarako eta aisiarako tokia izan da, herrigune eta hiriguneetatik aldendua. Egun, ingurune hiritartu batean, berdegune bat da, identifikatuta dauden zuhaitz eta zuhaixka espezie askotarikoak dituen paseo botanikoa duen parke handi bat eta, era berean, aldi batean edo etengabe Iruñerrian bizi diren hegazti ugariren habitata. Ibilbidean, Iruñerriaren gaineko hiru behatoki panoramikok, atseden hartzeko eremu batek, haurrak jolasteko elementuak dituenak, eta lorezaintza iraunkorra eta etxeko konpostajea erakusteko gune batek eskaintza osatzen dute.

Historia. Handituz joan den biztanleria urez hornitzeko erronka

Mendillorriko lehen bi ur-biltegiak 1895ean eraiki zituzten, Artetako iturburutik iristen zen ura biltzeko. Iruñea handitzen ari zen eta kalitateko urez hornitzea bermatuko zuten azpiegiturak eduki behar zituen. Egun, biltegi horiek martxan daude, eta bai 1942 eta 1975 artean eraikitako beste lau modernoago ere, biztanleriak izan duen emendatze etengabeari aurre egin ahal izateko. Denen artean, 68 milioi litro ur hartzen dituzte, Artetako eta Subitzako iturburuetatik eta Eugiko eta Itoizko urtegietatik iristen den ura.

Uraren Hiri Zikloko Ingurumen Heziketarako eta Informaziorako Zentroa

Mendillorriko Uren Etxea Uraren Hiri Zikloko Ingurumen Heziketarako eta Informaziorako Zentroa da. Uraren bidaia erakusketa iraunkorrak, maketek eta ikus-entzunezkoek, Horniduraren historia hiru dimentsiotako proiekzioak, uraren gaineko joko interaktiboek eta biltegietara egiten den bisitak era dinamikoan hurbiltzen gaituzte denboran zehar edateko ur ona edukitzeko premiari eman zaizkion konponbideetara eta, era berean, ahalbidetzen dute behar dugun unean eta tokian ura eskuragarri egoteko bidea ematen duen giza- eta teknika-ahaleginaren tamaina ezagutzea.